Ang Nagduka Nga Sapa Uban Ang Gugma
By Genamos_US of Washington DC, USA
Mga dahon sa daplin nangalagas
Gitayhop sa hangin nga lab-as
Ang kalinaw miduaw sa kalibutan
Nag-awitan ang mga kalanggaman
Ang bugnawng huyohoy walay sama
Linaw ang tubig na pagkatin-awa
Gidan-awagan sa adlaw nga siaw
Ang pughawng langit nagtan-aw
Dili halayo sa akong panan-aw
Ang punu-an sa mangga nga lunhaw
Kaniadto gamay pa ang punu-an
Matag hapon among pagkaduawan
Sama sa hangin ang panahon milabay
Ang kausaban sa palibot ang gisaysay
Gianod ang hunahuna sa kagahapon
Didto natawo ang gugmang naulipon
Ang sapa maoy saksi sa maong gugma
Duha ka kasingkasing nga nagkahiusa
Mga bahakhak, talidhay ug katawa
Gisawhan namong duha sama sa grasya