DIDTO SA BUWANGAN
By: Genamos_US of Washington, DC USA
Mga yangongog ug kasikas sa palibot
Sa matag daplin mga nawong nahimoot
Nagkalandrakas lang imahe sa mga panagway
Adunay nagtingsi, naminghoy apan way panudlay
Abi ko murag napus-an ug itlog nagpungko
Pildero diay sa sabongan maong nagdukoduko
Timaan nga nagmahay sa iyang gipustahan
Narimatsi hinoon ang iyang panudlanan
Alegre kaayo ang matag palibot bisan og gubot
Mga sabongero nagdala sa ilang mga abobot
Nagbitbit sa ilang manok hiniktan nga pinayongan
Hadlok sip-onon ang sunoy kay sa nahingtungdan
Porbida kon mao kining kahimtanga
Ang ruydahan napuno sa mga bisita
Nagpaminaw kon asa ang kusog nga sultada
Sa meron o wala mura ang mga mata ni Angelita